“Ateistdən bunu soruşun, Quran 2 kəlmə ilə deyir ki...” - İnsanın imana gəlişinə maneə nədir? - AMİN

“Amin” verilişinin yeni buraxılışında Hacı Cavad məscidinin imamı Ramil Aslanlı ilə müasir insan və iman mövzusu ətrafında fikir mübadiləsi aparılıb.

O, cəmiyyətdəki mənəvi boşluqların əsas səbəbini insanlarda səmimiyyətin itməsində görüb:

“Bu gün inanclı insanların ən böyük problemlərindən biri Allahla aralarında səmimiyyət qura bilməmələridir. Bunun təkcə müasirliklə əlaqəsi yoxdur. Günümüzdə cəmiyyətdə dəyərlərin itməsi, əxlaqi tənəzzül və istehlak mədəniyyətinin hökm sürməsi adamı yalnız maddi dünyaya, sərvət toplamağa və dünyəvi uğurlar arxasınca qaçmağa sövq edir. Bu isə insanı dini dəyərlərdən uzaqlaşdırır”.

Ramil Aslanlı həmçinin inanclı və inancsız insanın həyata baxış bucağındakı fərqlərdən bəhs edib:

“İnancsız birinin həyatı ön və arxa səhifələri itmiş bir kitaba bənzəyir. O, kitabın necə başlayıb, necə bitəcəyini bilmir, yalnız ortasından xəbərdardır. Bir ateist və ya materialistdən varlığın əvvəlinin və sonunun necə olduğunu soruşsaq, dəqiq cavab verə bilməyəcək. Amma inanclı insanda isə vəziyyət tam fərqlidir. O bilir ki, varlığın əvvəli də, sonu da Allahdandır”.