Axtarışa verilən Hüseyndən sərt sözlər | Oyun oynamaq istəyirsənsə, hazıram!

Rusiyada yaşayan azərbaycanlı bloger Hüseyn Həsənov axtarışa verilib.

Blogerə qarşı cinayət işinin açılmasını istəyən İnternet Təhlükəsizliyi Liqasının rəhbəri Yekaterina Mizulina olub.

Belə ki, tərəflər arasında münaqişə böyüyüb. Mübahisə zamanı Hüseyn kömək üçün dostu, teleqram sosial şəbəkəsinin yaradıcısı və sahibi Pavel Durova müraciət edib. Yekaterina isə blogerin tərəfdarlarından öz ünvanına fiziki təhdidlər gəldiyini bildirib.

Mübahisə Yekaterinanın sosial şəbəkədə Hüseynə qarşı cinayət işinin başlandığını və onun çoxsaylı müraciətlərindən sonra Federal axtarışa verildiyini yazması ilə başlayıb. Hazırda Birləşmiş Ərəb Əmirliklərində olan bloger əvvəlcə "hər şey bu qədər dramatik deyil" deyə bildirsə də, sonradan başına gələnlərdə Yekaterinanı ittiham edib.

O bildirib ki, 2024-cü ildə dövlət büdcəsinə vergi, cərimə və komissiyalar daxil olmaqla ümumilikdə 320 milyon rubl ödəyib və bunu ictimai şəkildə bəyan edib. Buna baxmayaraq, ona qarşı cinayət işi açılıb. O həmçinin Yekaterinaya birbaşa müraciət edərək onun büdcədən 200 milyon rubl xərcləməsi ilə bağlı ittihamları xatırladıb. Hüseyn Pavel Durova Yekaterinanın teleqram kanalının bloklanmasını xahiş edib.

“Əgər oyun oynamaq istəyirsənsə, oynayaq. Teleqram rəhbərliyini diqqətli olmağa çağırıram. Yekaterina cəmiyyətə zərər vurur. Məni vergidən yayınmaqda ittiham edir. Bəs sən 200 milyon büdcə rublunu necə xərclədiyini nə vaxt açıqlayacaqsan, Yekaterina? Büdcənin pulları ilə dəbdəbə içindəsən”, – deyə Hüseyn sosial media hesabında yazıb.

Hüseyn həmçinin izləyicilərini Yekaterinanın teleqram kanalını messencer administrasiyasına şikayət etməyə çağırıb.