Ayağı sınsa da, zəlzələ bölgəsini tərk etmədi

Nur Əliyev Türkiyənin zəlzələ qeydə alınan bölgələrinə Azərbaycandan göndərilmiş və qardaş ölkədə axtarış-xilasetmə əməliyyatlarına qatılan xilasedicilərimizdən biridir.

Digər heyət üzvləri kimi o da dağıntılar altında qalan insanları xilas etmək prinsipini öz şəxsi təhlükəsizliyindən üstün tutub. Elə buna görə də xilasetmə işlərinin birində ayağına beton plitə düşən Nur Əliyev xəstəxanaya getməyib. Ərazidəki səhiyyə qruplarının müdaxiləsi ilə onun ayağına gips qoyulub və axtarış-xilasetmə işləri bitənə qədər dağıntılar olan bölgəni tərk etməyib.

Axtarış-xilasetmə və tibb işçilərindən ibarət 750 nəfərlik azərbaycanlı heyətdən 236 nəfərini Adanadan Vətənə yola salmağa gələn Adana valisi Süleyman Elbar yaralı xilasedicimizə təşəkkür edib.

S.Elbar əlavə edib ki, Türkiyədə baş verən təbii fəlakətdən sonra köməyə yetişən ilk ölkələrdən biri Azərbaycan olub. Azərbaycanlı axtarış-xilasetmə qrupları gecə-gündüz dayanmadan köməklərini əsirgəməyiblər.