Aygün Bəylərin cənazəsi Bakıya nə vaxt gətiriləcək? | Yaxınlarından açıqlama

Ankarada vəfat edən Əməkdar artist Aygün Bəylərin nəşi yanvarın 7-də Bakıya gətiriləcək.

Bu barədə Baku TV-yə onun yaxınları məlumat veriblər.

Bildiriblər ki, sənətçi dünyasını Türkiyədə dəyişdiyinə görə sənədləşmə prosesi uzun çəkdiyi üçün cənazənin ölkəyə gətirilməsi yubanıb. Sənəd işləri həll olunan kimi Əməkdar artistin nəşini aparmaq üçün Türkiyəyə göndərilən xüsusi təyyarə Bakıya yola düşəcək.

Mədəniyyət Nazirliyinin sözçüsü Aynur Kərimova isə müğənninin cənazəsinin ölkəyə nə zaman gətiriləcəyi, həmçinin mərhumla harada vida mərasiminin keçiriləcəyi, o cümlədən hansı məzarlıqda dəfn olunacağı barədə məlumatsız olduqlarını bildirib. Xəbər olan kimi ictimaiyyətə məlumat veriləcəyini qeyd edib.

Xatırladaq ki, 48 yaşlı Əməkdar artist Aygün Bəylər uzun müddətdir xərçəng xəstəliyindən əziyyət çəkirdi. O, yanvarın 6-da Ankarada müalicə aldığı xəstəxanada vəfat edib.