AZAL Naxçıvanla bağlı sərnişinlərə müraciət etdi

Naxçıvanda hava şəraitinin müvəqqəti yaxşılaşması ilə əlaqədar olaraq “Azərbaycan Hava Yolları” dünəndən etibarən təxirə salınmış 4 reys həyata keçirib.

“Azərbaycan Hava Yolları” QSC-nin mətbuat xidmətindən verilən məlumata görə, gecikmiş J2-267 reysinin sərnişinlərinin Bakıdan Naxçıvana saat 10:40-da uçacağı gözlənilir. Bu marşrut üzrə digər gecikmiş reyslərin sərnişinlərinə uçuş vaxtı haqqında əlavə məlumat mümkün olduğu təqdirdə veriləcək.

“Meteoroloqların proqnozuna görə, Naxçıvanda hava şəraiti gündüz saatlarında yenidən pisləşə bilər, bununla əlaqədar AZAL sərnişinlərdən reysinin yola salınması ilə bağlı məlumat gözləməyi və daha sonra hava limanına gəlməyi xahiş edir.

Gecikmiş reyslərlə bağlı aktual məlumatı aviaşirkətin rəsmi sosial şəbəkə hesablarında və KİV-də əldə etmək, həmçinin callcenter@azal.az elektron poçt ünvanı vasitəsilə əlaqə saxlamaq mümkündür”, – deyə məlumatda bildirilib.