Azərbaycan əhalisinin ən çox nəyə xərci çıxır?

2023-cü ilin yanvar-iyul aylarında əhali ticarət şəbəkələrində 31 milyard manatdan çox pul xərcləyib.

Dövlət Statistika Komitəsindən verilən məlumata görə, vətəndaşların gəlirlərinin yarıdan çoxu – 52 faizi ərzaq məhsullarının alınmasına sərf olunub. Xərclərin 12,5 faizini geyim və ayaqqabı, 5,4 faizini yanacaq, 4,4 faizini içki və tütün məmulatları, 5 faizə yaxınını isə elektrik malları və mebelə sərf olunan vəsaitlər təşkil edib.

2022-ci ilin yanvar-iyul ayları ilə müqayisədə 2023-cü ilin eyni dövründə əhalinin ən çox kompüter və mobil telefonlarla bağlı xərcləri artıb.

Belə ki, bu məhsulların alınmasına 327 milyon manatdan çox pul xərclənib ki, bu da 13 faizə yaxın çoxdur.

Alıcılar eyni zamanda yanacağa 2022-ci illə müqayisədə 6 faiz çox – 1 milyard 700 min manata yaxın pul sərf ediblər. Həmçinin geyim və ayaqqabıya xərclənən vəsait 5 faiz artaraq 4 milyard manata yaxın olub. Əczaçılıq məhsulları və tibbi ləvazimatlarla bağlı xərclər isə 9 faizdən çox azalıb.