Azərbaycan əhalisinin sayı açıqlandı

Əhalinin son siyahıyaalınmasının nəticəsi əsasında 2023-cü il sentyabrın 1-nə əhalinin sayı 10 163 176 nəfər təşkil edib.

Dövlət Statistika Komitəsinin məlumatına görə, ümumi rəqəmlərdə şəhər əhalisinin xüsusi çəkisi 54,6, kənd əhalisinin xüsusi çəkisi 45,4, kişilərin xüsusi çəkisi 49,8, qadınların xüsusi çəkisi isə 50,2 faiz olub.

İlin 8 ayı ərzində ölkə üzrə 75 623 doğulan körpə qeydə alınıb və ötən ilin müvafiq dövrü ilə müqayisədə əhalinin hər 1 000 nəfərinə bu göstərici azalaraq 12,3-dən 11,2-yə düşüb.

Doğulanlar arasında oğlan uşaqlarının xüsusi çəkisi 53,3, qızların xüsusi çəkisi isə 46,7 faiz olub. Həmçinin dünyaya gələn körpələrdən 2 288-i əkiz, 99-u üçəm, 4-ü isə dördəm olub. 2023-cü ilin yanvar-avqust ayları ərzində ölkədə 40 472 ölüm halı qeydə alınıb.

Bildirilib ki, 2022-ci ilin müvafiq dövrü ilə müqayisədə əhalinin hər 1 000 nəfərinə bu göstərici azalaraq 6,2-dən 6-ya düşüb. İlin yanvar-avqust aylarında 33 836 nikah və 14 544 boşanma halları qeydə alınıb.

Komitənin məlumatına görə, ötən illə müqayisədə əhalinin hər 1 000 nəfərinə nikahların sayı azalaraq 6-dan 5-ə düşüb, boşanmaların sayı isə 1,5-dən 2,2-yə qədər artıb.