Azərbaycan məktəblərində erməni dili tədris olunacaq?

Ermənistanın üç dövlət məktəbində 2025-2026-cı dərs ilindən Azərbaycan dilinin tədrisi təşkil olunub.

Belə ki, 10-12-ci sinif şagirdləri üçün Azərbaycan və türk dillərinin öyrənilməsi təmin ediləcək. Proqram könüllü şəkildə həyata keçiriləcək.

Maraqlıdır, ölkəmizdəki orta məktəblərdə də erməni dilinin tədrisi mümkündürmü?

Baku TV məsələ ilə bağlı paytaxt sakinlərinin fikirlərini öyrənib.

“Erməni dili kurslarda tədris oluna bilər. Amma orta məktəblərdə bu dilin tədris olunmasını istəmirəm”, – sakinlərdən biri söyləyib.

Digər bir vətəndaş isə belə deyib: “O mənim dilimi bilirsə, mən də qarşı tərəfin dilini öyrənməliyəm. Bəlkə, öz dilində məni təhqir edir?! Dilini bilməliyəm ki, ona cavab verim”.

Təhsil eksperti Kamran Əsədovun sözlərinə görə, hazırkı mərhələdə erməni dilinin orta məktəblərdə tədrisi cəmiyyətdə emosional narahatlıq yarada bilər:

“Həm də orta məktəblərdə bu dili tədris edə biləcək kifayət qədər mütəxəssis yoxdur. Amma bəzi ali təhsil müəssisələrində erməni dili tədris olunur”.

Məsələ ilə bağlı Elm və Təhsil Nazirliyindən bildirilib ki, ümumtəhsil müəssisələrində erməni dilinin tədrisi hazırda nəzərdə tutulmayıb. Gələcəkdə məsələ ilə bağlı yenilik olacağı təqdirdə ictimaiyyətə məlumat veriləcək.