Azərbaycan Ordusunun aprel qələbəsindən 7 il ötür

Bu gün Aprel döyüşlərindən 7 il ötür. Döyüşlər Ermənistanın martın sonlarından etibarən cəbhə xəttində genişmiqyaslı təxribat törətməsinə cavab olaraq başlamışdı.

Azərbaycan Ordusu 2016-cı il aprelin 1-dən 2-nə keçən gecə Ermənistan Silahlı Qüvvələrinin təxribatlarına cavab verərək sürətli əks-hücum əməliyyatı ilə düşməni ağır məğlubiyyətə uğratdı. Azərbaycan 4 günlük müharibə ilə Füzuli, Cəbrayıl və keçmiş Ağdərə rayonlarının işğal altındakı ərazilərinin 2000 hektardan çox hissəsini azad etdi. Həmçinin minlərlə hektar ərazi Azərbaycan Ordusunun tam nəzarətinə keçdi.

Ordumuz Aprel döyüşlərində Lələtəpə və Talış yüksəkliyini, digər bir sıra mühüm strateji yüksəklikləri işğaldan azad etdi. Lələtəpə yüksəkliyinin işğaldan təmizlənməsi Cəbrayılın Cocuq Mərcanlı qəsəbəsinin və Füzulinin Horadiz şəhərinin təhlükəsizliyini təmin etdi. Düşmənin 30-dan çox tankı, 25-dən çox artilleriya qurğusu və digər zirehli texnikası məhv edildi, 320 hərbçi qulluqçusu öldürüldü, 1000-dən artıq döyüşçüsü yaralandı.

Aprel döyüşləri Azərbaycan üçün böyük zəfərin başlanğıcı idi. 4 günlük müharibə Vətən müharibəsində işğalda qalan torpaqların işğaldan azad edilməsində həlledici rol oynadı. Uğurlu Aprel döyüşlərinin məntiqi davamı olaraq, Azərbaycan Ordusu 2020-ci il sentyabrın 27-dən başlayaraq 44 gün ərzində torpaqlarımızı işğaldan azad etdi.