Azərbaycan polisinin yaradılmasının 105-ci ildönümü

İyulun 2-də Azərbaycan polisinin yaranmasının 105-ci il dönümü qeyd edilir.

Qurum 1918-1920-ci illərdə ilk müstəqil dövlətimizin fəaliyyətinin təhlükəsizliyinin təmin edilməsində əlahiddə rol oynayıb. Onlar Birinci Qarabağ müharibəsində də daim ön cəbhədə olublar. 1 700-ə yaxın polis əməkdaşı şəhidlik zirvəsinə ucalıb.

44 günlük Vətən müharibəsində də Daxili Qoşunların 66 əməkdaşı şəhid olub, 346 hərbi qulluqçu isə yaralanıb. Daxili Qoşunların əməkdaşlarından 1 690 nəfər Prezident İlham Əliyevin imzaladığı sərəncamlarla orden və medallara, o cümlədən 4 nəfər “Vətən Müharibəsi Qəhrəmanı” adına layiq görülüb.

Qeyd edək ki, Ötən il Daxili İşlər Nazirliyi və Prokurorluq üzrə qeydə alınmış cinayətlərin 89.7%-i açılıb. Ağır və xüsusilə ağır cinayətlərin 85.3%-i, şəxsiyyət əleyhinə qanun pozuntularının 98.2%-i açılıb.

Statistik göstəricilərə görə, Azərbaycan polisi peşəkarlığına görə nəinki regionun, o cümlədən bir sıra aparıcı Avropa ölkələrinin təhlükəsizlik orqanlarını üstələyir. Belə ki, ölkəmizin kriminal indeksi Litva, İspaniya, Macarıstan kimi Avropa İttifaqı ölkələrindən daha aşağıdır.