Azərbaycan Prodüserlər Gildiyası FIAPF-yə üzv qəbul edilib - Baku TV

Azərbaycanın kino sənayesi üçün mühüm hadisə baş verib.

Belə ki, Azərbaycan Prodüserlər Gildiyası rəsmi olaraq dünyanın ən nüfuzlu kino təşkilatlarından biri olan Beynəlxalq Kino Prodüserləri Assosiasiyaları Federasiyasına tamhüquqlu üzv qəbul edilib.

Üzvlük 2026-cı il yanvarın 1-dən rəsmi şəkildə aktiv olacaq.

"Azərbaycan Prodüserlər Gildiyasının sözügedən təşkilata qoşulması, Azərbaycan kinosunun beynəlxalq səviyyədə tanınması və mövqeyinin güclənməsi istiqamətində atılan strateji bir addımdır". Bu barədə Gildiyanın sədri Müşfiq Hətəmov məlumat verib.

"Beynəlxalq Kino Prodüserləri Assosiasiyaları Federasiyasına üzvlük Azərbaycan prodüserlərinin işini beynəlxalq standartlara uyğunlaşdırmaq və onları qlobal kino bazarına inteqrasiya etmək üçün geniş imkanlar açır. Bu həm prodüserlərin hüquqlarının daha etibarlı qorunması, həm də yerli kino layihələrinə xarici investisiyaların cəlb edilməsi, beynəlxalq koprodüksiya layihələrində iştirakın artırılması baxımından tarixi əhəmiyyətə malikdir. Azərbaycan kinosu artıq dünyanın aparıcı kino ölkələri ilə bir platformada təmsil olunur", – deyə M.Hətəmov bildirib.

Onun sözlərinə görə, Azərbaycan Prodüserlər Gildiyası bu yeni statusdan istifadə edərək fəaliyyətini müəllif, prodüser hüquqları və kino istehsalı ilə bağlı beynəlxalq qanunvericilik sahəsində təkmilləşdirməyə, beynəlxalq şəbəkə vasitəsilə Azərbaycan kinosunu xarici prodüserlərə, distribütorlara və investorlara daha fəal şəkildə tanıtmağı planlaşdırır.