Azərbaycanda ilk dəfə "Global HR Summıt" keçirilib

Azərbaycan HR İnstitutunun təşkilatçılığı, NEQSOL Holding-in baş sponsorluğu, ABB, Anzera, Amrop, Təhsil Tələbə Kredit Fondu, OBA, "MKT İK MMC"nin sponsorluğu ilə bu gün Bakıda ilk dəfə yerli və qlobal şirkətlərin baş icraçı direktorları, insan resursları peşəkarları, dövlət qurumlarının rəsmiləri və sahibkarların iştirakı ilə “Global HR Summit 2023” tədbiri keçirilib.

Tədbirdə yerli və beynəlxalq şirkətlərin insan resursları üzrə baş direktorları, dünyanın aparıcı konsaltinq şirkətlərinin rəhbərləri, dövlət qurumlarının vəzifəli şəxsləri ilk dəfə vahid platformada insan resurslarının idarə olunması sahəsində baş verən son yeniliklər və gələcək gözləntilərdən bəhs ediblər.

Sammit iştirakçıları layiqli əmək və ümumdünya insan resurslarının gücləndirilməsi, rəqəmsal insan resursları və süni intellekt, rəhbərlərin strateji insan resursları perspektivləri və digər maraq kəsb edən mövzularla bağlı yeni fikir və təcrübələrə sahibləniblər.

Qeyd edək ki, Azərbaycan HR İnstitutu tərəfindən 2022-ci ildə “Baku International HR Forum” və “Baku International CEO Summit” tədbirləri uğurla həyata keçirilib.