Azərbaycanda narkotiklə mübarizə | 2024-cü il üçün 11 aylıq nəticələr açıqlandı

Сari ilin yanvar-noyabr ayları ərzində hüquq-mühafizə orqanları tərəfindən narkomanlığa və narkotik vasitələrin qanunsuz dövriyyəsinə qarşı mübarizə sahəsində həyata keçirilən kompleks əməliyyat-axtarış tədbirləri nəticəsində ümumilikdə 8 549 cinayət faktı aşkarlanıb.

Bu barədə Narkomanlığa və narkotik vasitələrin qanunsuz dövriyyəsinə qarşı mübarizə üzrə 2024-cü ilin yanvar-noyabr aylarının yekunlarına dair məlumatda qeyd olunub.

Bildirilib ki, onlardan 2 837-si narkotik vasitələrin qanunsuz satışı, 5 478-i narkotik vasitələrin qanunsuz əldə edilib saxlanılması, 228-i narkotik tərkibli bitkilərin qanunsuz əkilib becərilməsi, 6-sı isə digər cinayətlərlə bağlı olub.

Narkotiklərin qanunsuz dövriyyəsi ilə bağlı 6 693 nəfər cinayət məsuliyyətinə cəlb edilib. Həmin şəxslərdən 6 497-si kişi, 196-sı qadın olub. Cinayət məsuliyyətinə cəlb edilənlərdən 59 nəfəri əcnəbi vətəndaşlardır.

Hesabatda qeyd olunub ki, xarici ölkə mənşəli narkotik vasitələrin təxminən 95%-dən çoxu qaçaqmalçılıq və digər qanunsuz yollarla Azərbaycana gətirilib.

Cari ilin ötən dövründə 1439,6 hektar sahədə 2 864 953 ədəd yabanı halda bitən narkotik tərkibli bitkilər müəyyən olunaraq müvafiq qaydada məhv edilib.