Azərbaycanda psixoloji reabilitasiya imkanları artırıldı | Psixoloqlara sertifikatlar təqdim edildi

ABŞ və Azərbaycanda qeydiyyatdan keçən “For Azerbaijan” Beynəlxalq Xeyriyyə Təşkilatının həyata keçirdiyi “Azərbaycanda psixoloji reabilitasiya imkanlarının artırılması” layihəsinin yekunlarına dair tədbir keçirilib.

Çıxış edənlər Azərbaycanda ilk dəfə tətbiq olunan yeni müalicə növlərinin effektivliyi, layihənin həyata keçirilməsinin vacibliyini vurğulayıblar.

Daha sonra müalicə metodikaları üzrə təlimləri uğurla başa vuran psixoloqlara beynəlxalq sertifikatlar təqdim edilib.

“For Azerbaijan” Xeyriyyə Təşkilatının proqram direktoru Elnur Kələntərov bildirib ki, Azərbaycanda psixoloji reabilitasiya imkanlarının artırılması layihəsi çərçivəsində ölkəmizə posttravmatik stres pozuntusu müalicəsində 2 yeni müalicə üsulu – koqnitiv işləmə və yazılı ekspozisiya terapiyaları gətirilib:

“40 azərbaycanlı psixoloq təxminən 1 il ərzində sözügedən təlimlərə qatıldılar. Yeni müalicə metodikaları və üsulları sübut etdi ki, terapiyaların tam kursunu başa vuran insanlarda sağalma faizi 91-in üzərindədir.

Bu bizim üçün çox böyük göstəricidir. Azərbaycanda beynəlxalq sertifikat alan yerli mütəxəssislərimizi təbrik edirik və əminik ki, onların qazandıqları biliklər gələcəkdə şəhid və qazi ailələrinə göstərilən dövlət dəstəyinə də töhfəsini verəcək”.