Azərbaycanlı biznesmen oğlunun döydüyü gənclərə nə təklif etdi

Pankration üzrə beşqat Moskva çempionu Zöhrab Qələndərov Moskvanın Marino rayonunda üç nəfəri döyüb, lakin iş adamı atası ona məsuliyyətdən yayınmağa kömək edir.

19 yaşlı idmançı Myaçkovski bulvarında barda həmyaşıdlarını təhqir etməyə başlayıb. Şifahi mübahisə davaya çevrilib.

Qələndərov gənclərdən birini arxadan vurub və huşunu itirərək yıxılanda başı asfalta dəyib. Sonradan həkimlər ona qanaxma ilə açıq kəllə-beyin travması diaqnozu qoyublar. Çempion ikincinin iki dişini sındırıb və üçüncünün başına güclü zərbə endirib.

Bildirilir ki, iş polisə qədər gedib çıxanda idmançının atası, azərbaycan əsilli iş adamı Akif Qələndərov hadisə ilə bağlı yazılan xəbəri daha yumşaq yazıya dəyişməyə nail olub.

Zöhrabın vəkili zərərçəkənə 450 dollar təklif etsə də, zərərçəkmiş buna razılaşmayıb və ədaləti bərpa etmək niyyətindədir.

Hazırda sözügedən hadisə Rusiyada geniş müzakirə mövzusudur və bəzi dairələr tərəfindən anti-Azəbaycan ton verməyə cəhdlər var.