Azərbaycanlı ilə evlənən danimarkalı gəlini hansı adətlər təəccübləndirdi? - ARZUNUN VAXTI

“Arzunun vaxtı” verilişinin yeni buraxılışında Danimarkadan olan Daniella və azərbaycanlı həyat yoldaşı Emin Əzimzadə öz ailə hekayələrindən söz açıblar.

Türkiyədə tanış olan cütlük fərqli mədəniyyətlərə sahib olmalarına baxmayaraq, sevgi, hörmət və qarşılıqlı anlayış sayəsində 19 ildir xoşbəxt ailə həyatı yaşayır.

“İlk vaxtlar hər iki ailədə müəyyən narahatlıqlar var idi. Dilimiz, adətlərimiz, mədəniyyətimiz fərqli idi. Hamı düşünürdü ki, bu ailə necə olacaq”, – deyə Daniella Əzimzadə qeyd edib.

Daniella xanım toy və elçilik mərasimlərində yaşadığı maraqlı anlardan da danışıb:

“Bizdə elçilik, xına və xonça kimi adətlər yoxdur. İlk dəfə xına mərasimində qırmızı paltar geyindirdilər, başıma yaylıq örtdülər. Ətrafımda mahnılar oxuyurdular, amma heç nə başa düşmürdüm”.

Azərbaycan dilini gündəlik ünsiyyət vasitəsilə öyrəndiyini deyən danimarkalı gəlin bəzi ifadələri uzun müddət yanlış anladığını bildirib:

“İllərlə elə bilirdim ki, “qurban” qoyunun adıdır. “Başa düşdüm” ifadəsini isə “başım düşdü” kimi deyirdim. Ən çox sevdiyim “canım”, “gözüm”, “ürəyim” kimi gözəl müraciətlərdir, bizdə belə sözlər yoxdur. Diliniz çox zəngindir”.

Üç övlad böyüdən cütlük uşaqlarının Azərbaycan dilini və milli dəyərləri öyrənməsinə xüsusi önəm verdiklərini vurğulayıb:

“Övladlarımız dörd dildə danışırlar. Azərbaycan dilini öyrənmələrini xüsusilə istədik. Evimizdə Azərbaycan mahnılarına qulaq asır, adət-ənənələri qoruyub saxlayırıq”.