Azərbaycanlı müğənni sağ imiş | Bakı Caz Festivalının direktorundan təcili xəbər

Azərbaycanlı müğənni Albina Pyakşevanın ölüm xəbəri yalan çıxıb.

Qeyd edək ki, iyulun 5-də Bakı Caz Festivalının direktoru Leyla Əfəndiyeva “Facebook” hesabında paylaşım edərək bildirmişdi ki, Albina Pyakşeva ABŞ-Meksika sərhədində öldürülüb.

“Belə bir xəbər almaq çox üzücüdür. “I am Jazzman” yarışmasının finalisti Albina Pyakşeva faciəvi şəkildə can verib. O, Meksika ilə ABŞ sərhədində keçid məntəqəsini keçmək istəyərkən öldürülüb”, − deyə paylaşımda qeyd olunmuşdu.

Leyla Əfəndiyeva sosial şəbəkə hesabında daha bir paylaşım edərək ölüm xəbərini təkzib edib.

“Əzizlərim, yeni bir xəbər aldım. Albina sağdır. Dünəndən etibarən şəbəkələrdə dezinformasiyalar gedir. Bunun hansı məqsədlə edildiyini bilmirəm, amma Albinaya ən yaxşısını arzulayıram və çox şadam ki, bütün bunlar sadəcə kiminsə səhvi və ya bilərəkdən etdiyi hərəkətlər olub”, − deyə Bakı Caz Festivalının direktoru Leyla Əfəndiyeva bildirib.

Qeyd edək ki, Albina Pyakşeva Bakı Caz Festivalı çərçivəsində gənc ifaçılar arasında keçirilən “I am Jazzman” müsabiqəsinin finalçısı olub, eyni zamanda “Səs Azərbaycan” proqramında iştirak edib.