Azərbaycanlı sənətçi Jeyleen dünyanın ən məşhur caz festivallarından birində çıxış edəcək - Baku TV

Hazırda İsveçrədə yaşayan gənc və istedadlı azərbaycanlı müğənni-bəstəkar Jeyleen bu yay əfsanəvi Montrö Caz Festivalında iştirak edəcək. Jeyleen iyulun 7-də keçiriləcək Festivalın yubiley xarakterli 60-cı buraxılışında səhnəyə çıxacaq.

“23 yaşlı Jeyleen alternativ musiqi səhnəsinin yeni dalğasının parlaq təmsilçisidir. Zərif söz duyumuna malik müğənni və mahnı müəllifi olan Jeyleen rok enerjisini, soul üslubunu və kinematoqrafik səs teksturalarını böyük ustalıqla bir araya gətirir. Daimi dəyişikliklər şəraitində formalaşan sənətçi müxtəlif mədəniyyətlərin, duyğuların və cəsarətli kontrastların qovuşduğu özünəməxsus bədii kainat yaradıb. Onun musiqisi sakitliklə xaos, harmoniya ilə dissonans arasındakı həssas tarazlığı araşdırır”, – deyə Festivalın rəsmi saytındakı konsert anonsunda qeyd olunub.