Azərbaycanlı xilasedici göz yaşlarına boğuldu
Bu gün milyonların gözü onların üzərindədir. Çünki onlar həyat xilas edir. Hər gün yeni bir can xilas olduqca milyonlara ümid doğur.
Söhbət bir insanın həyatını xilas etmək üçün öz həyatlarını heçə sayan xilasedicilərdən gedir. “Zərərçəkmişi çıxaranda insan sanki yenidən doğulur” deyən İntiqam Həsənov Baku TV-yə xilasedicilərin yaşadığı çətin anlardan danışıb.
“Zərərçəkmişi xilas edəndə ona suyu çox verməməlisən, ürəyi partlaya bilər. Huşunu itirməməsi üçün onunla söhbət etməlisən. Xəsarət alıbsa, ona ilkin tibbi yardım göstərməliyik. Səhv edib zərərçəkənin ölümünə səbəb olsaq, özümüzü bağışlaya bilmərik”, - deyə xilasedici qeyd edib.
İ.Həsənov Türkiyədə baş verən zəlzələnin fəsadlarının aradan qaldırılması və axtarış-xilasetmə işlərinin həyata keçirilməsi üçün qardaş ölkəyə göndərilməyini gözlədiyini deyib.