Bakı-Sumqayıt qatarlarındakı sıxlığın səbəbi | ADY sədri açıqladı

Sumqayıt və Bakı arasında dəmir yolunda kifayət qədər sərnişin sıxlığı var.

“Azərbaycan Dəmir Yolları” QSC-nin sədri Rövşən Rüstəmov jurnalistlərə açıqlamasında sərnişin sıxlığını artımla əlaqələndirib.

2023-cü ilin əvvəlində günlük 24 min sərnişin daşındığı halda, bu rəqəm indi 30 mindən çoxdur.

Onun sözlərinə görə, soyuq və qeyri-normal hava şəraitində də belə problemlər yarana bilir. Səbəb isə dəmir yolu infrastrukturunun çox köhnə olmasıdır.

Rövşən Rüstəmov bildirib ki, Bakı dairəvi dəmir yolunda elektrik sistemi ötən əsrin 20-ci illərində qurulub. Modernizasiya olunsa da, yolun əsaslı və yenidən təmirə ehtiyacı var.

Hazırda bu istiqamətdə layihə hazırlandığını deyən qurum sədri yolun tamamilə yenidən qurulmasının planlaşdırıldığını açıqlayıb.

Rövşən Rüstəmov cənub istiqamətində dəmir yolu xəttinin sərnişindaşıma üçün açılması məsələsinə də toxunub. Bildirib ki, bu yol yalnız əsaslı yenidənqurma işlərindən sonra sərnişindaşıma üçün bərpa oluna bilər.