Bakıda 74-cü Astronavtika Konqresi keçiriləcək

Baş nazir Əli Əsədovun sədrliyi ilə Bakıda keçirilməsi planlaşdırılan 74-cü Beynəlxalq Astronavtika Konqresinin Təşkilat Komitəsinin ilk iclası keçirilib.

Əli Əsədov ilk dəfə 1950-ci ildə Parisdə keçirilən konqresin dünyada kosmik sahə üzrə ən nüfuzlu tədbir hesab olunduğunu bildirib. Tədbirin miqyasını və önəmini nəzərə alaraq onun yüksək səviyyədə təşkilinin mühüm əhəmiyyət kəsb etdiyi vurğulanıb.

Diqqətə çatdırılıb ki, Azərbaycan artıq bir dəfə, 1973-cü ildə Beynəlxalq Astronavtika Konqresinə ev sahibliyi edib. Sovet İttifaqında ilk və yeganə konqres o vaxt Ulu Öndər Heydər Əliyevin şəxsi nüfuzu sayəsində Bakıda keçirilib.

Tədbirdə bütün bu nailiyyətlərin konqresin ən yüksək səviyyədə keçirilməsinə şərait yaradacağına əminlik ifadə olunub. Bu məqsədlə konqresin keçirilməsi ilə bağlı Tədbirlər Planının hazırlandığı və icra edilməsi üçün Nazirlər Kabineti tərəfindən aidiyyəti üzrə müvafiq tapşırıq verildiyi diqqətə çatdırılıb.

Daha sonra konqresə hazırlıq məqsədilə görülən işlər və Tədbirlər Planının icrası ilə bağlı rəqəmsal inkişaf və nəqliyyat naziri, Təşkilat Komitəsi sədrinin müavini Rəşad Nəbiyev geniş təqdimatla çıxış edib.

İclasda Bakı konqresinə hazırlıq işlərinə dair müzakirələr aparılıb, Tədbirlər Planında qarşıya qoyulan vəzifələrin vaxtında və keyfiyyətlə icra olunması ilə bağlı Təşkilat Komitəsinin üzvlərinə müvafiq tapşırıqlar verilib.