Bakıda BRAF-ın 11-ci toplantısı baş tutdu | Medianın mənfi təsirlərindən qorunmaq üçün nə etməliyik?

Media sahəsində rəqəmsallaşma ilə yanaşı, bir çox imkanlar əldə olunub, lakin bu proseslə birlikdə ciddi təhlükə daşıyan məzmunlar da yayılmağa başlayıb.

Bu fikirləri Radio və Televiziya Üzrə Tənzimləyici Qurumun (RTÜRK) sədr müavini Deniz Güler aprelin 15-də Bakıda keçirilən BRAF-ın 11-ci Toplantısında jurnalistlərə açıqlaması zamanı deyib.

O qeyd edib ki, RTÜRK zərərli məzmunları mütəmadi olaraq nəzarətdə saxlayır və monitorinqlər aparır:

“Ehtiyac olduqda bu məzmunlara qarşı inzibati tədbirlər, yəni cəzalar tətbiq edirik. Lakin məsələ təkcə cəza tətbiqetməsi ilə məhdudlaşmır. Eyni zamanda cəmiyyətin bu mövzuda maarifləndirilməsi də olduqca vacibdir.

Bu məqsədlə Türkiyə Respublikası Milli Təhsil Nazirliyi ilə əməkdaşlıq protokolumuz var. Bu protokol çərçivəsində uşaqlarımıza və müəllimlərimizə rəqəmsal medianın riskləri barədə təlimlər verilir”.