Bakıda əyləncənin yeni ünvanı: "BIMLAND"da uşaqları nələr gözləyir? - Baku TV

Uşaqların təhlükəsiz, maraqlı və keyfiyyətli istirahətinin təşkili məqsədilə yaradılan məkanların sayı artır. Bu istiqamətdə növbəti layihə Qala Dövlət Tarix-Etnoqrafiya Qoruğunda həyata keçirilib.

Azərbaycanın ən böyük açıq hava uşaq əyləncə mərkəzlərindən biri hesab edilən “BİMLAND”ın rəsmi açılışı baş tutub. Müxtəlif attraksionlar, batutlar, ailəvi istirahət zonaları və əyləncə proqramları ilə diqqət çəkən məkan ilk ziyarətçilərini qəbul edib.

Mərkəz ümumilikdə 7 min kvadratmetr ərazini əhatə edir. Burada müxtəlif yaş qruplarından olan uşaqlar üçün texniki və mexaniki attraksionlar, eləcə də geniş batut zonaları yaradılıb.

“Bakıda belə bir məkanın yaradılması çox gözəldir. Burada hər cür şərait var və müxtəlif yaş qruplarından olan uşaqlar nəzərə alınıb”, – deyə valideynlərdən biri bildirib.

Mərkəzi ziyarət edən uşaqlar da yaradılan şəraitdən razı qaldıqlarını deyiblər.

“Burada çox maraqlı oyunlar var. Hər şey xoşuma gəldi. Ümid edirəm ki, hamı gəlib burada əylənəcək. Havanın sərin olması da istirahəti daha rahat edir”, – deyə azyaşlı ziyarətçilərdən biri söyləyib.

Layihənin İçərişəhər Dövlət Tarix-Memarlıq Qoruğu İdarəsinin dəstəyi və Bakı İllüziya Muzeyinin birgə fəaliyyəti nəticəsində ərsəyə gəldiyi vurğulanıb.

“Bakı İllüziya Muzeyi artıq dörd aydır fəaliyyət göstərir. Bu müddət ərzində çoxsaylı ailələrin və uşaqların sevincinə şahid olduq. Uşaqlar üçün daha böyük əyləncə məkanına ehtiyac olduğunu nəzərə alaraq bu layihəni həyata keçirdik. Bu gün Azərbaycanın ən böyük açıq hava uşaq əyləncə mərkəzlərindən birinin açılışını edirik”, – deyə Bakı İllüziya Mərkəzinin direktoru Tofiq Sadıqov bildirib.