Bakıda fasilələrlə yağış yağacaq | Hava haqqında məlumat

Avqustun 11-də Bakıda və Abşeron yarımadasında hava şəraitinin dəyişkən buludlu olacağı, arabir tutulacağı, günün birinci yarısında bəzi yerlərdə yağış yağacağı gözlənilir. Səhər yarımadanın ayrı-ayrı ərazilərində qısamüddətli leysan xarakterli olacağı, şimşək çaxacağı ehtimalı var.

Bu barədə Milli Hidrometeorologiya Xidmətindən məlumat verilib.

Bildirilib ki, arabir güclənən şimal-qərb küləyi gündüz şimal-şərq küləyi ilə əvəz olunacaq.

Avqustun 12-də əsasən yağmursuz hava şəraiti proqnozlaşdırılır. Mülayim şimal-şərq küləyi əsəcək. Havanın maksimal temperaturu 29-33 dərəcə isti olacaq.

Bölgələrdə də bəzi yerlərdə arabir yağış yağacağı, şimşək çaxacağı gözlənilir. Ayrı-ayrı yerlərdə, xüsusən də Qazax, Gəncə, Balakən, Şəki, Quba, Qusar, Dağlıq Şirvan ərazilərində yağıntıların qısamüddətli leysan xarakterli olacağı, dolu düşəcəyi ehtimalı var.

Havanın maksimal temperaturu Aran rayonlarında 30-35, dağlıq ərazilərdə isə 20-25 dərəcə isti olacaq.