Bakıda qadınlara qarşı soyğunçuluq edən şəxs saxlanıldı

Paytaxtın Xətai rayonu, Yeni Günəşli qəsəbəsində Orxan İsgəndərov adlı şəxs bankomatlardan birindən pul çıxaran qadını izləyərək ona qarşı soyğunçuluq etməyə cəhd göstərib.

Daxili İşlər Nazirliyinin mətbuat xidmətindən bildirilib ki, zərərçəkən izahatında hadisə zamanı O.İskəndərovun içərisində 3 min manat olan çantanı ələ keçirmək istədiyini, amma yaranan səs-küy nəticəsində cinayəti sona çatdırmadan ərazidən uzaqlaşdığını deyib.

Bakı şəhər Baş Polis İdarəsi və Suraxanı Rayon Polis İdarəsinin 33-cü Polis Bölməsinin əməkdaşları tərəfindən “isti” izlərlə keçirilən əməliyyat-axtarış tədbirləri nəticəsində hadisəni törətməkdə şübhəli bilinən əvvəllər məhkum olunmuş O.İsgəndərov təkrar cinayət etmək məqsədilə “Əhmədli” metrosu yaxınlığındakı bankomatı müşahidə edərkən saxlanılıb. Bununla da onun növbəti dəfə cinayət hadisəsi törətməsinin qarşısı alınıb.

Faktla bağlı əməliyyat-istintaq tədbirləri davam etdirilir.