Bakıda retro avtomobillərin sərgisi keçirilib

Avtomobil Federasiyası (AAF) və “Zhara Events”in təşkilatçılığı ilə avqustun 26-da Bakıda klassik avtomobillərin sərgisi keçirilib.

Heydər Əliyev Mərkəzinin qarşısında təşkil olunan sərgidə avqustun 27-də keçiriləcək yürüş üçün qeydiyyatdan keçən klassik avtomobillər, eləcə də Heydər Əliyev Mərkəzində nümayiş etdirilən bəzi nəqliyyat vasitələri yer alıb. Sərgidə ümumilikdə 140-dan çox avtomobil nümayiş olunub.

Həmçinin Azərbaycanda ilk dəfə avtomobil üzərində unikallığı ilə seçilən dekorativ kompozisiya məhz “Qaz-M21 Volqa” avtomobili üzərində yaradılıb.

Sərgidə 1983-cü ilədək istehsal olunan retro nəqliyyat vasitələri nümayiş etdirilib. Ən qədim avtomobil isə 1931-ci il istehsalı olan “Ford Model A” markalı maşın olub.

Klassik avtomobillər avqustun 27-də Heydər Əliyev Mərkəzinin qarşısından start götürərək “Sea Breeze” istirahət mərkəzi istiqamətinədək yürüş edəcəklər.

50 kilometrdən çox məsafəni qət edərək istirahət mərkəzinə çatan klassik avtomobillərin burada da sərgisi təşkil olunacaq. Tamaşaçılara həmçinin tanınmış ifaçıların iştirakı ilə konsert təqdim ediləcək.

Qeyd edək ki, əyləncə proqramına müsabiqələrin, müxtəlif nominasiyalarda hədiyyələrin təqdimatı da daxildir.