Balakəndə qız köçəndə ata niyə evdən gedir? - Ər, arvad və qudanı birləşdirən əlaqə - KƏNDİNƏ QAYIT

“Kəndinə qayıt” verilişinin yeni buraxılışı yayımlanıb.

Verilişin budəfəki sayında avarların kompakt yaşadığı Balakən rayonunun Qabaqçöl qəsəbəsinə səyahət edilib.

Rayonun 100 202 nəfərdən ibarət əhalisinin təxminən 25 faizini avarlar təşkil edir. Onların sıx yaşadığı Qabaqçöl qəsəbəsinə getmək üçün Balakənin mərkəzindən 12 kilometr məsafə qət etmək lazımdır.

Qabaqçölün Meşəşambul kəndinin ağsaqqalı Hacı Osmanov avar xalqının köhnə toy adətlərindən söz açıb:

“Keçmişdə toylarımız nağara-zurna ilə keçirilirdi. O dövrdə dəvətnamələr olmadığı üçün insanları toya çağırmaqdan ötrü onların evlərinə gedirdilər. Toylar səhər saat 10-da başlayır və axşama kimi davam edirdi. Qız gəlin köçəndə atası və qardaşları evdən gedirdilər. Bu adət abır, həyadan irəli gəlirdi”.

Müasir toy adətlərindən danışan musiqiçi Bəxtiyar Kantayev avar toylarının çox sevilməsinin səbəblərini açıqlayıb.

“Toylarımız şən, ritmik olduğu üçün gələn qonaqların xoşuna gəlir. Ən məşhur rəqsimiz “Yerli hava”dır. Toy başlayan kimi böyüklər həmin rəqsi mütləq oynamalıdırlar. Oğlanlar ritmik rəqs edərkən qızlar daha zərif oynayırlar. Rəqs zamanı bəzən oğlan və qızın bir-birindən xoşu gəlir. Hətta elə olur ki, oğlan qızı toydan qaçırır”, − deyə o əlavə edib.