Banda yaradıb, dəhşətli qətllər törədən şəxsə hökm oxundu | 25 il sonra...

Cinayətkar qruplaşma təşkil edərək Bakının müxtəlif ərazilərində bir sıra ağır və xüsusilə ağır cinayət əməlləri törətməkdə təqsirləndirilən, uzun müddət axtarışda olan Xalid Tağıyevin cinayət işi üzrə məhkəmə araşdırması yekunlaşıb.

Bakı Ağır Cinayətlər Məhkəməsində hakim Səbuhi Hüseynovun sədrliyi ilə keçirilən sonuncu prosesdə prokuror dövlət ittihamını müdafiə edərkən təqsirləndirilənin 15 il azadlıqdan məhrum edilməsini məhkəməyə təklif edib.

Müşavirədən sonra hökm elan edilərək Xalid Kərimov qəti olaraq 15 il azadlıqdan məhrum edilib.

Cinayət Məcəlləsinin bir neçə maddəsi ilə təqsirləndirilərək barəsində axtarış elan edilən Xalid Tağıyevlə bağlı Baş Prokurorluğun İstintaq idarəsində araşdırma aparılıb. İstintaqla Xalid Tağıyevin 1995-1999-cu illər ərzində cinayətkar birlik təşkil edərək qruplaşmanın digər üzvləri ilə birgə Bakının müxtəlif ərazilərində bir sıra ağır və xüsusilə ağır cinayət əməlləri törətməsinə dair əsaslı şübhələr müəyyən edilib.

Belə ki, onun 1998-ci ilin sentyabrın 2-də Suraxanı rayonu, Əmircan qəsəbəsində yerləşən fərdi yaşayış evinə basqın etməsinə, ev sahibi Məmməd Hacıyevi, həmin ilin sentyabr ayının sonunda Sabunçu rayonu, Bilgəh qəsəbəsində Arif Quliyevi, 1999-cu ilin sentyabr ayının 11-də isə Zahid Vəliyevi qəsdən öldürməsinə əsaslı şübhələr üzə çıxıb.

Bundan başqa, Xalid Tağıyevin həmin cinayətkar dəstənin tərkibində quldurluq, rəsmi sənədləri və möhürləri oğurlama, müvafiq icazə olmadan odlu silah və döyüş sursatı əldə etmə, saxlama və gəzdirmə kimi əməlləri aşkarlanıb.

Cinayət Məcəlləsinin müxtəlif maddələri ilə təqsirləndirilən, barəsində beynəlxalq axtarış elan edilən Xalid Tağıyev 2024-cü ilin fevralın 12-də hüquq-mühafizə orqanları tərəfindən saxlanılaraq istintaqa təqdim edilib. Məhkəmənin qərarı ilə onun barəsində həbs qətimkan tədbiri seçilib.