Banklar insanların hüquqlarını tapdalayır?

Təsəvvür edin ki, hər hansı işinizi həll etmək və ya ehtiyacınıza görə bankdan pul götürürsünüz.

Məbləği sizə verən bank kredit müddətində hər hansı problem yaranarsa, sizinlə yanaşı, sizə yaxın bir neçə nəfərin də əlaqə nömrəsini tələb edir. Kredit götürən də işini asanlaşdırmaq üçün tələbə əməl edir. Məsələnin problemli tərəfi də elə buradan başlayır.

Borc ödəmək və ya zamin durmaq kimi öhdəliyi olmayan, sadəcə əlaqələndirici rolunu oynayan şəxs isə yalnız ona hansısa bankdan zəng gəlib, problem izah olunduğu zaman məsələdən xəbərdar olur.

Bu məqamda isə sual yaranır. Bank nömrəsi təqdim olunan şəxsdən onun razılığını əvvəlcədən niyə almır?

İqtisadçı ekspert Əkrəm Həsənov məsələ ilə bağlı bildirib ki, telefon nömrəsi verilən şəxsin vətəndaşın kredit borcuna görə heç bir məsuliyyəti yoxdur: “Hətta həmin şəxs ona edilən zənglərdən narahatlığını da ifadə edə bilər. Burada heç bir ciddi problem yoxdur”.

Xülasə, ödənilməyən borca görə bank tərəfindən gələn saysız zənglər sizdə məsuliyyət yaratmır. Bu halların baş verməməsi üçün bank özü bu məsələdə maraqlı və məsuliyyətli olmalıdır.