Baş Prokurorluqdan Bakıda silahlı insidentlə bağlı açıqlama

Paytaxtın Nəsimi rayonu Səməd Vurğun küçəsindəki silahlı insidentlə bağlı iki nəfər həbs edilib. Bu barədə Baş Prokurorluq və Daxili İşlər Nazirliyi birgə məlumat yayıb.

Bildirilib ki, Prokurorluq və DİN əməkdaşlarının keçirdiyi tədbirlər nəticəsində məlum olub ki, digər şəxslərlə qabaqcadan əlbir olan 28 yaşlı Şahmar İsmayılov və 25 yaşlı Vüqar Quliyevin şəxsi münasibətlər zəminində Nicat Əkbərovu öldürmək məqsədilə qanunsuz əldə olunmuş odlu silahdan atəş açması, Nicat Ələkbərovun atəşdən yayınması nəticəsində təsadüfən hadisə yerində olan 40 yaşlı Tamerlan Hüseynov və 21 yaşlı Fəqan Rəhimlinin müxtəlif xəsarətlər almasına əsaslı şübhələr müəyyən edilib.

İstintaq-əməliyyat tədbirləri nəticəsində şübhəli şəxs qismində saxlanılan Şahmar İsmayılov və Vüqar Quliyev Cinayət Məcəlləsinin qabaqcadan əlbir olan bir qrup şəxs tərəfindən ümumi təhlükəli üsulla adam öldürməyə cəhd, qanunsuz olaraq odlu silah əldə etmə və digər maddələri ilə təqsirləndirilən şəxs qismində cəlb olunaraq barələrində məhkəmənin qərarı əsasında həbs qətimkan tədbiri seçilib.

Hadisə yerinə və cinayəti törətməkdə şübhəli bilinən şəxslərin idarə etdiyi avtomobilə baxış keçirilərkən 1 ədəd tapança, patron və gilizlər, eləcə də iş üzrə əhəmiyyət kəsb edən digər sübutlar aşkar edilərək götürülüb. Cinayət işi üzrə istintaq və əməliyyat-axtarış tədbirləri davam etdirilir.