Baxmırlar da, belə olmaz axı... | Bilgəhin acınacaqlı vəziyyətdə olan yerindən reportaj

Məşhur “Kölgədə 40 dərəcə isti” filminin çəkildiyi Bilgəh qəsəbəsi, Dəniz küçəsi ərazisində antisanitar vəziyyət hökm sürür.

Zibil qutuları vaxtında toplanmadığından sakinlər məişət tullantılarını yerə atırlar. Həmçinin zibil toplayan maşın su borusunu partlatdığı üçün vətəndaşların gediş-gəlişinə maneə yaranıb.

“Zibilin suyu yerə axır. Ayaqqabımızı çıxaranda zibil qoxusu gəlir. Bura çox zibil yığılır. Dərə olub deyə hamı zibili ora tökür. Antisanitariyadır, bura heç baxmırlar. Belə olmaz”, – deyə sakin narazılığını bildirib.

Məsələ ilə bağlı Sabunçu Rayon İcra Hakimiyyətindən bildirilib ki, tullantı daşıyan nəqliyyat vasitəsində yaranan texniki nasazlıq səbəbindən əmələ gələn tullantı yığını 15 avqust tarixində təmizlənib.

Tullantıların gündəlik daşınması qrafikinə riayət edilərək 16 avqust tarixində gün ərzində əmələ gələn tullantılar daşınıb. Ərazinin sanitar vəziyyəti və tullantıların daşınması qrafiki nəzarətdə saxlanılır.