Bələdiyyələrin maliyyə təminatı artırılacaq

Bələdiyyələrin inkişafı ölkəmiz üçün prioritet olaraq qalmaqdadır. Lakin hələ də bu yerli özünüidarəetmə orqanı ilə bağlı çətinliklər qalmaqda davam edir.

Çətinliklərdən başlıcası bələdiyyələrin maliyyə imkanlarının məhdud olmasıdır. Bu isə yerli özünüidarəetmə orqanının fəaliyyətinə birbaşa təsir edən amillərdəndir.

Bir sıra inkişaf etmiş ölkələrdə bələdiyyələr fəaliyyətə başlayandan sonra yerli icra hakimiyyəti strukturları fəaliyyətini dayandırıb və onların funksiyaları bələdiyyələrə həvalə olunub. Ölkəmizdə isə həm bələdiyyə, həm də yerli icra orqanları fəaliyyətlərini davam etdirir.

Bələdiyyələrin böyük hissəsi əhalinin etimadını qazana bilməyib. Bələdiyyələr aidiyyatı üzrə onlara müraciət edən sakinlərin problemlərini həll etməkdə çətinlik çəkir.

Deputat Siyavuş Novruzovun sözlərinə görə, gələcəkdə bələdiyyələrə ayrılan maliyyə təminatının daha da artırılması gözlənilir. Millət vəkili onu da bildirib ki, belə olacağı təqdirdə isə onların fəaliyyəti müsbət istiqamətdə dəyişə bilər.