"Bilmirəm ki, qışı necə yola verəcəyik" - Əhali imdad diləyir: “Bura yarandığı gündən...” - Baku TV

İsmayıllı rayonunun Bəhliyan kəndinin sakinləri Baku TV-nin qaynar xəttinə müraciət edərək mavi yanacağın olmamasından əziyyət çəkdiklərini bildiriblər.

Kənddə vəziyyət o həddə çatıb ki, sakinlər həyətlərindəki meyvə ağaclarını doğrayaraq odun kimi istifadə edirlər. Bildirilir ki, kənd mövcud olduğu gündən bu günədək təbii qazla təmin olunmayıb.

Sakinlərin əsas tələbi kəndin qısa müddətdə qazlaşdırılmasıdır. Onlar xüsusilə qış aylarında odun tədarükünün ailə büdcəsinə ciddi yük yaratdığını deyirlər.

“Bu yayı birtəhər keçiririk. Kimisi 5, 10, 20, 30 manat verib balon doldurur, beləcə dolanırıq. Amma payız-qış gələndə çox əziyyət çəkirik. Allaha and olsun, oduna 1000 manatdan çox pul çıxır. Müraciət etmişik, amma dediyimiz söz elə söz olaraq qalıb”, – sakinlərdən biri bildirib.

Başqa bir sakin isə odunun qiymətinin yüksək olmasından şikayətlənib:

“Bir maşın odun 700 manata başa gəlir. Gərək bir inəyini verəsən ki, iki maşın odun alasan. Adam var ki, üç maşın yandırır, adam var ki, dörd maşın yandırır. Neçə dəfə icra nümayəndəsinə demişik, baxan yoxdur”.