Bina sakinləri ayağa qalxdı | Qurumlar şikayətlərlə bağlı nə dedi? - Baku TV

Nəsimi rayonu, Asif Məhərrəmov küçəsi, 44A ünvanında yaşayan sakinlər binanın zirzəmisində çalışan zərgərlərin fəaliyyətindən narazıdırlar.

Onların sözlərinə görə, zərgərlik sexindən həm pis qoxu yayılır, həm də obyektlərin elektrik xətti binanın ümumi enerji təminatına qoşulub.

Sakinlərdən biri bildirib ki, obyektlərin fəaliyyəti binanın elektrik xəttinə əlavə yük yaradır:

“Azərişıq” işıq xəttimizi zərgərlərin istifadəsinə verib. Əgər partlayış baş versə, heç birimiz buradan sağ çıxa bilməyəcəyik”.

Digər bir vətəndaş isə təhlükənin qarşısının alınmamasından narazı olduğunu deyib:

“Burada ölüm olmasa, heç bir tədbir görməyəcəklər. İndidən şikayətimizi bildiririk, niyə baxmırlar?!”.

Məsələ ilə bağlı “Azərişıq” ASC-dən bildirilib ki, sakinlərin narahatlığı əsassızdır. Qurumun məlumatına görə, binaya verilən elektrik xətti ilə sexin enerji xətti bir-birindən ayrıdır.

Vətəndaşları narahat edən digər bir məqam – qoxu ilə bağlı Ekologiya və Təbii Sərvətlər Nazirliyindən qeyd olunub ki, daxil olan şikayətlər əsasında Ətraf Mühitin Çirklənməsinin Monitorinq Qrupunun mütəxəssisləri tərəfindən ünvanda yoxlama aparılıb. Nəticədə, sexlərdən havaya atılan tullantıların normativ hədlər daxilində olduğu müəyyən edilib.