Bina sakinlərinə istiliyin verilməsi niyə dayandırıldı? | "Azəristiliktəchizat"dan cavab

Paytaxtın Nəsimi rayonu, Səməd Vurğun 116 ünvanında yerləşən binalardan birinə istilik verilməsi dayandırılıb.

Sakinlərin sözlərinə görə, onlara heç bir xəbərdarlıq edilmədən istiliyi kəsiblər.

“Adətən istilik aprelin 15-də kəsilir. Aprelin 15-nə 1 ay qalmış tamamilə bütün binanın istiliyini kəsdilər. Deyirlər ki, guya bizim borcumuz var. Heç kimin evini yoxlamadan, heç kimə demədən, istiliyi kəsiblər. Heç kim bilmir ki, nə qədər borcu var, qəbz gəlməyib”, – şikayətçi deyib.

“Azəristiliktəchizat”ın mətbuat katibi Elvin Basqallı isə deyilənləri təkzib edib. Vətəndaşların istifadə etdikləri enerjiyə görə borclarını ödəmədiklərini və xəbərdarlıq üçün binanın girişində elan yerləşdirdiklərini deyib:

“Binada 104 mənzil var. Onlardan 46-sı mərkəzləşdirilmiş qaydada istiliklə təmin edilir. 42-si isə istilik haqlarını ödəmir. Yəni cəmi 4 mənzil istilik haqlarını ödəyib. Bununla əlaqədar bütün mənzillərə xəbərdarlıq edilib. Blokların önündə elanlar vurulub. Bu səbəbdən də binanın istilik təchizatı dayandırılıb”.

Qurum rəsmisi onu da əlavə edib ki, istilik binaya fərdi yox, ümumi verildiyindən borcunu ödəyənlər də istiliksiz qalıblar.