“Bir dəqiqə, əl vurmayın!” | Qalmaqal: Bu şirkət insanlara kələk gəlirmiş? - Baku TV

Sosial şəbəkələrdə “Tiens” şirkəti ilə bağlı şikayətlərin sayı artmaqdadır.

Vətəndaşların sözlərinə görə, şirkət onlardan “işə düzəltmək” adı altında pul alıb, lakin sonradan heç bir işlə təmin etməyib. İddia olunur ki, bu hallar uzun illərdir davam edir. Buna baxmayaraq, şirkət hələ də fəaliyyət göstərir.

Baku TV məsələni aydınlaşdırmaq məqsədilə sözügedən şirkətin yerləşdiyi ünvanda çəkiliş aparıb.

“Tiens” şirkətinin nümayəndəsi Bəxtiyar Cəfərov bildirib ki, məsələ ilə bağlı məlumatlıdırlar və hüquq-mühafizə orqanlarına müvafiq informasiyalar təqdim edilib:

“Hazırda məsələ araşdırılır. “Tiens” şirkətinin konsepsiyasında kimlərinsə məhsul satmağa məcbur edilməsi kimi hallar yoxdur. Biz, sadəcə, şirkətin Azərbaycandakı nümayəndəliyi olaraq qida əlavələrinin satılması ilə maraqlanan şəxslərə maarifləndirici məlumatlar təqdim edirik”.

Bəs vətəndaşlar iş elanlarına baxarkən nələrə diqqət etməlidirlər?

İnsan resursları üzrə mütəxəssis Aydan Yüzbaşova mövzu ilə bağlı bildirib ki, iş elanlarında vəzifə, öhdəliklər və tələblər aydın şəkildə göstərilməlidir:

“Elanlarda şirkət haqqında məlumatlar şəffaf olmalıdır. Şirkətin hüquqi ünvanı, əlaqə nömrəsi, tam adı və elektron poçt ünvanı qeyd edilməlidir. İşə qəbul zamanı namizədlərdən heç bir ödəniş tələb olunmur. Sənədləşmə, qeydiyyat və ya təlim adı altında pul istənilməsi fırıldaqçılıq əlamətidir. İnsan resursları nümayəndəsi görüş zamanı işlə bağlı konkret və dolğun məlumat verməli, namizədi tələsdirməməli və ona psixoloji təzyiq göstərməməlidir”.