Bölgələrə qar yağıb

Bir neçə gündür ölkə ərazisində qeyri-sabit hava şəraiti müşahidə olunur. Ötən gündən başlayaraq dağlıq və dağətəyi rayonlarda qar yağıb, qərb küləyi ayrı-ayrı rayonlarda arabir güclənib.

Daşkəsən rayonunda da artıq 2 gündür güclü qar yağır, şaxtalı hava şəraiti davam edir. Yağan qarın qalınlığı rayonun mərkəzində 5-10 sm, daha yüksəklikdə yerləşən Çıraqlı, Əmirvar, Zinzahal, Qabaqtəpə, Astaf, Alaxançallı, Qaraqullar kimi dağ kəndlərində 15-20 sm-ə çatıb.

Gədəbəyə aprelin 1-i gecə saatlarından başlayaraq qar yağır. Dağ kəndləri ilə yanaşı, qar rayonun mərkəzinə də yağıb. Dağlıq ərazilərə təxminən 35 sm-dən artıq, rayon mərkəzinə isə 5-10 sm düşüb. Son 2 gündür ölkənin şimal-qərb bölgəsində yağışlı və qarlı hava şəraiti hökm sürür, havanın hərarəti mənfi 3 dərəcəyə qədər aşağı düşüb.

Martın 31-dən aprelin 1-ə keçən gecədən başlayaraq bölgənin dağ və dağətəyi kəndlərinə fasilələrlə qar yağıb. Bölgədə qar ən çox dəniz səviyyəsindən 1 700 m yüksəklikdə yerləşən Qax rayonunun Sarıbaş kəndinə yağıb. Kənddə qarın hündürlüyü 7 sm olub, 3 dərəcə şaxta qeydə alınıb.

Ölkə ərazisində hökm sürən qeyri-sabit hava şəraitinin aprelin 2-nə qədər davam edəcəyi bildirilir. Aprelin 2-si səhər saatlarından qərb rayonlarında yağıntı tədricən kəsiləcək. Bakıda və Abşeron yarımadasında müşahidə olunan küləkli hava şəraiti axşama doğru mülayimləşəcək.