"Borc yazılıb, mən kanalizasiya işlədirəm?!" | Boğaza yığılan sakinlər şikayət etdi - Baku TV

Mingəçevir şəhərinin Günəşli küçəsində kanalizasiya suları küçəyə və həyətlərə axır.

Təxminən 500 sakinin yaşadığı ərazidə yaranan problem vətəndaşların narazılığına səbəb olub.

Baku TV-nin qaynar xəttinə müraciət edən sakinlərin sözlərinə görə, kanalizasiya suları küçədə antisanitar vəziyyət yaradır, ətrafa kəskin qoxu yayılır və hərəkət çətinləşir.

“Biabırçılıqdır, qoxudan dayanmaq olmur. Dəfələrlə şikayət etmişik, baxan yoxdur”, – deyə sakinlərdən biri qeyd edib.

Məsələ ilə bağlı İri Şəhərlərin Birləşmiş Su Təchizatı Xidmətindən bildirilib ki, ərazidə icra olunan tullantı su şəbəkəsi layihəsi hələ tam başa çatdırılmayıb və tikinti-quruculuq işləri davam etdirilir.

Qeyd olunub ki, vətəndaşların kanalizasiya xətlərinin tikintisi tamamlanmamış xəttə qoşulması nəticəsində daşma baş verib.

Qurumun məlumatına görə, bir neçə gün əvvəl əraziyə cəlb olunan Mingəçevir Sukanal İdarəsinin qəza briqadası xəttdəki daşmanın qarşısını alıb və tullantı sularını digər şəbəkəyə yönləndirib. Hazırda məsələ həll edilib.