Böyük Marağa səbəb olan sərgi

Azərbaycan Milli Elmlər Akademiyasının Arxeologiya, Etnoqrafiya və Antropologiya İnstitutu, Folklor İnstitutu, Dünya Türkologiya Mərkəzi və Türk Dünyası Ağsaqqalları İctimai Birliyinin Qadınlar Şurasının təşkilatçılığı ilə martın 17-də “Novruz ənənələri: qadın yaradıcı, qoruyucu və ötürücü kimi” mövzusunda beynəlxalq elmi konfrans keçirilib.

Beynəlxalq konfrans iştirakçıları öncə arxeoloji - etnoqrafik təqdimat və qadın əl sənəti nümunələrindən ibarət sərgi ilə tanış olublar. Sərgidə baramadan qadın bəzək əşyaları, təbii ipəkdən baş geyimləri, müxtəlif aksessuarlar, təbii dəridən və müxtəlif parçalardan Novruz suvenirləri nümayiş etdirilib.

Beynəlxalq tədbiri giriş sözü ilə AMEA-nın Arxeologiya, Etnoqrafiya və Antropologiya İnstitutunun direktoru Abbas Seyidov açıb. O, Novruz ənənələrinin Azərbaycanın milli mədəniyyət tarixində yerindən, bütün qadağalara baxmayaraq, xalımızın yüzillər boyunca bu bayramı yaşatmasından danışıb.

Beynəlxalq konfransda türk dövlətçiliyində qadın, türk dünyasının cəsur qadınları, qadının cəmiyyətdə rolu, qadın sənətkarlığı, mərasim və ayinlərin yaradılmasında qadınların rolu, Novruz mərasimlərində arxaik ənənələr və s. mövzularda məruzələr dinlənilib.

Qeyd edək ki, konfransda Azərbaycan, Türkiyə, Qırğızıstan və Rusiyadan türkoloq alimlər iştirak ediblər.