Bu gün başqa qiymət, sabah başqa | Ölkədəki qiymətlərdə artım var?

Dövlət Statistika Komitəsinin məlumatına görə, 2024-cü ilin iyun ayında ölkədə qiymətlər əvvəlki ilin eyni ayı ilə müqayisədə 1,1 faiz artıb. Yanvar-iyun aylarında ümumilikdə qiymətlər ötən ilin müvafiq dövrünə nisbətən 0,7 faiz yüksəlib. 2024-cü il üzrə orta illik inflyasiyanın 2,7 faiz olacağı proqnozlaşdırıb.

Baku TV mövzu ilə bağlı paytaxt sakinləri arasında sorğu keçirib.

Sorğu iştirakçıları qiymət artımının daha çox olduğunu düşündüklərini bildiriblər. “Pensiya, maaş azdır. Amma qiymətlər od bahasınadır”, – sakin söyləyib.

İqtisadçı Rəşad Həsənov isə deyir ki, inflyasiyanın hesablanmasında əsas məqam məlumatların düzgün toplanmasıdır.

“Alternativ yolla inflyasiyanın hesablanması böyük miqdarda maliyyə vəsaiti və resurslar tələb etdiyindən bu işin Azərbaycanda qeyri-hökumət təşkilatları tərəfindən həyata keçirilməsi mümkünsüzdür. Başqa sözlə, alternativ hesablanma aparılmadığından rəsmi göstəricilərin mübahisələndirilməsi də əsaslı deyil”, – deyə o əlavə edib.