Bu qədim inancın elmi izahı yoxdur | Versiyalara görə isə...

Hava dəyişəndə, xüsusən yağışdan əvvəl bəzi insanların oynaqları ağrıyır.

Əsrlər boyu aparılan müşahidələrə baxmayaraq, alimlər hələ də bunun səbəbini və hava ilə oynaq ağrıları arasında əlaqə olub-olmadığını dəqiq müəyyən edə bilməyiblər.

“The Conversation” portalı bu mövzuda alimlərin fikirlərini dərc edib.

Bildirilir ki, ağrı hissini izah edən əsas səbəblərdən biri barometrik təzyiqdir. Barometrik təzyiq hündürlükdən və hava şəraitindən asılı olaraq dəyişir: aşağı təzyiq adətən yağışlı və buludlu havanı, yüksək təzyiq isə aydın və sakit günləri göstərir.

Oynaqlar hərəkəti asanlaşdıran xüsusi maye ilə örtülmüş mürəkkəb strukturlardır. Lakin osteoartrit kimi xəstəliklərdə ətraf mühitdəki kiçik dəyişikliklər belə ağrıya səbəb ola bilər.

Bir çox alim düşünür ki, atmosfer təzyiqinin azalması oynaqlardakı iltihablı toxumaların genişlənməsinə və bunun ağrını artırmasına səbəb olur. Alimlər bu nəzəriyyəni dəstəkləyirlər, amma nəticələr hələ də birmənalı deyil.

Yeni bir araşdırma təzyiqin azalması ilə oynaq ağrıları arasında ortasəviyyəli bir əlaqə tapıb, amma hava dəyişikliklərinə fərdi reaksiyalarda əhəmiyyətli fərqlər olduğu qeydə alınıb.

Bundan əlavə, barometrik təzyiq təkbaşına təsir göstərmir. Temperatur və rütubət də oynaq ağrılarına təsir edir. Buna baxmayaraq, hansı faktorun – temperatur, rütubət və ya təzyiqin oynaq ağrılarına daha çox təsir etdiyini müəyyən etmək çətindir.

Alimlər hesab edirlər ki, hava ilə oynaq ağrıları arasındakı əlaqə hələ də tam olaraq elm tərəfindən sübut edilməsə də, toplanmış məlumatlar göstərir ki, bu qədim inancın bir hissəsi həqiqətə əsaslana bilər.