Bu qidaların istifadəsi sizi xərçəngdən qoruya bilər | Alimlərindən maraqlı araşdırma

Stanford Tibb Məktəbinin alimləri lifin sağlamlığa təsirlərini araşdıraraq, bu qidanın genetik fəaliyyətə və xərçəngə qarşı mübarizədəki rolunu müəyyənləşdiriblər.

“Nature Metabolism” jurnalında dərc olunan tədqiqat lifin həzm prosesində yaranan qısa zəncirli yağ turşularının gen ifadəsini dəyişdirərək, xərçəngə qarşı müdafiə mexanizmlərini aktivləşdirdiyini aşkara çıxarıb. Lifin həzmi zamanı bağırsaq mikrobiomu tərəfindən istehsal olunan propionat və butirat, hüceyrələrdə genetik səviyyədə apoptoz, yəni hüceyrə ölümü, hüceyrə proliferasiyası və diferensiasiyası kimi prosesləri tənzimləyən genlər epigenetik təsir göstərir.

Bu proseslər nəzarətsiz hüceyrə artımını dayandırmaq və xərçəngin qarşısını almaq üçün həyati əhəmiyyət daşıyır. Araşdırma göstərib ki, bu yağ turşuları bağırsaqdan qan dövranına daxil olaraq bədənin müxtəlif hissələrinə təsir göstərə bilər.

Tədqiqatın rəhbəri, genetika üzrə professor Michael Snyder müasir insanların lifdən kasad pəhrizinin mikrobiomu zəiflətdiyini və bunun qısa zəncirli yağ turşularının istehsalını azaltdığını vurğulayıb. Kolon xərçənginin gənc nəsildə artan yayılma hallarını nəzərə alaraq, bu tədqiqat liflə zəngin pəhrizin xərçəng əleyhinə təsirlərini daha dərindən öyrənmək üçün yeni istiqamətlər təqdim edir.

Araşdırma nəticələri göstərir ki, qoz-fındıq, lobya, avokado kimi liflə zəngin qidaların gündəlik qəbulu yalnız sağlamlığı yaxşılaşdırmaqla kifayətlənmir, həm də genetik səviyyədə xərçəngin qarşısını almağa kömək edə bilər.