“Bu Şəhərdə” komandasından keçmiş deputata sərt cavab | Ssenarist tənqidləri önəmsəmədi

Milli Məclisin sabiq deputatı Etibar Əliyev “Bu Şəhərdə” kollektivini sərt şəkildə tənqid edib.

Keçmiş millət vəkili komandanın səhnəciklərini qınayıb və onları biabırçılıq adlandırıb:

"Qadının ərəblə tanışlıq" səhnəsi lap biabırçılıqdır. Şit hərəkətlər, adət-ənənələrimizi aşağılamaq, küçə söhbətlərini səhnəyə gətirmək teatrın süqutudur".

Məsələ ilə bağlı Yenisabah.az-a tanınmış ssenarist və aktyor, “Bu Şəhərdə”nin prodüseri Müşfiq Abbasov danışıb. Ssenarist hər bir fikrə hörmətlə yanaşdığını, lakin bu tənqidləri o qədər də önəmsəmədiyini qeyd edib:

“Mən sabiq deputatın həm haqqımızda verdiyi açıqlamanı, həm də onun haqqında məlumatı indi oxudum. Hər bir fikrə hörmətlə yanaşırıq. Birincisi, belə başa düşdüm ki, sabiq deputatımız üzvü olduğu partiyaların, deputatı olduğu rayonun, çalışdığı təhsil sahəsinin bütün problemlərini həll edib, indi də səhərdən-axşama kimi bizim – Azərbaycan tarixində Heydər Əliyev Sarayında ən çox konserti olan "Bu Şəhərdə"nin səhnəciklərini elə izləyir ki, hamısını əzbər bilir. Buna çox şadam.

İkincisi, dəfələrlə partiya dəyişmiş Etibar Əliyevin fikrinə nə qədər etibar etmək olar bilmirəm, amma onu bilirəm ki, bizim tamaşaçıların sayı qədər onun seçicisi olsaydı, o, sabiq deputat olmazdı. Allah bizim tamaşaçıları qorusun!”.