Stüardessa Hökumə Əliyevanın evindən reportaj | Həyat yoldaşı danışdı - ARZUNUN VAXTI
“Hökumə üçün hansı gözəl sözü desəm, azdır. Çox tərbiyəli, savadlı, qabiliyyətli, əl bacarığı olan xanım idi. Həmişə tərbiyəsi, savadı, oturuşu-duruşu ilə hər kəsə nümunə olurdu”.
Bunu Baku TV-də yayımlanan “Arzunun vaxtı” verilişində təyyarə qəzasında həlak olan Azərbaycanın Milli Qəhrəmanı, stüardessa Hökumə Əliyevanın həyat yoldaşı Etibar Əliyev deyib.
Onun sözlərinə görə, H.Əliyeva hər zaman öhdəliklərini layiqincə və düzgün şəkildə icra edirdi:
“Uçuşda olanda insanlara ürək-dirək verirdi, onları təsəlli edirdi, hər şeyi başa salırdı. İzah edirdi ki, qorxmağa, narahat olmağa heç bir əsas yoxdur. “Hamımız birlikdə gedirik, birlikdə də qayıdacağıq” deyirdi”.
E.Əliyev təyyarə qəzası barədə məlumatı bacısından öyrəndiyini söyləyib:
“Bacım dedi ki, iş qrupunda təyyarənin qəzaya uğradığı yazılıb. Eşidəndə dizlərim qırıldı. Onun cəsarətini, şücaətini Azərbaycan xalqı, bütün dünya gördü. Xalqımızın başı sağ olsun, böyük faciədir. Arzu edirəm ki, onun kimi şərəfli ölüm mənə də qismət olsun”.
Hökumə Əliyevanın həyat yoldaşı ən çox onun təmiz ürəyi, şirin sözləri üçün darıxacağını söyləyib:
“O qədər yaxşı xüsusiyyətləri var idi ki, bilmirəm, hansı birini deyim. Onu həmişə “mələyim” deyə çağırardım. Hökumə həyatımın bələdçisi idi. Həmişə onunla səmimi olmuşuq. Nə sözümüz olub demişik, açıqsözlü olmuşuq. Biz bir-birimizə dayaq idik. Çətin anlarda bir-birimizin əlindən tuturduq, dərdlərimizi, fikirlərimizi bölüşürdük. Var ömür-gün yoldaşı, bir də var ömrüm, günüm. O mənim ömrüm, günüm idi. Hökumənin vəfatı ilə həyatım, ömrüm getdi”.
#Hökumə Əliyeva teqi istifadə olunub
- AZAL təyyarəsinin qəzasında həlak olan ekipaj üzvlərinin büstü qoyuldu
- Milli Qəhrəman Hökumə Əliyevanın atası Kəlbəcərdə Prezidentə şeir dedi
- Hökumə Əliyevanın doğum günü ilə əlaqədar bir dəqiqəlik sükut elan olundu
- Hökumə Əliyevanın doğum günündə atasından duyğulandıran sözlər | "Dövlətimdən xahiş edirəm ki..."
- Faciəvi qəzada həlak olan Hökumənin atası danışdı | Niyə təyyarəmizi vurublar?
