Bufetlərdə satılan "təhlükə" : Məktəblərdən niyə pul yığılır?

Məktəb bufetlərində qiymətlərin marketdəkindən baha olması və düzgün qidalanma üçün nəzərdə tutulan məhsulların satılmaması valideynləri narahat edən məsələlərdəndir.

Zaman-zaman bəzi məktəblərdə şagirdlərin zəhərlənməsi halları da valideynlərin narahatlığını artırır.

Ekspertlərin fikrincə, neqativ faktların baş verməsinin səbəbi məktəb bufetlərinin fəaliyyətinə mərkəzləşdirilmiş nəzarətin olmamasıdır.

“Regional idarələr artıq məktəblərdən şagird başına əlavə 35 qəpik pul alırlar. Bu da qiymətlərin yüksəldilməsinə gətirib çıxarır. Dünya təcrübəsində şagirdlərə məktəb bufetlərində ödənişsiz olaraq süd və isti yeməklər verilir.

Hesab edirəm ki, Azərbaycanda da ən azından şagirdlərə gündə bir dəfə ödənişsiz olaraq süd və isti yemək verilə bilər”, – təhsil eksperti Kamran Əsədov bildirib.

Qeyd edək ki, məktəb bufetlərinə nəzarət tədbirləri Nazirlər Kabinetinin 171 nömrəli Qərarına əsasən aparılır. Qida Təhlükəsizliyi Agentliyi illik plan və vətəndaşlardan daxil olan müraciətlər əsasında yoxlamalar aparır.

Bakı Şəhər Təhsil İdarəsindən isə bildirilib ki, təhsili idarəetmə qurumları iaşə xidmətlərinə nəzarət edən dövlət qurumları ilə birgə əməkdaşlıq edir. Monitorinqlərin nəticələri təhlil olunur və zəruri tədbirlər görülür.