Bunlara diqqət edin! - Azərbaycanda yeni virusla bağlı hansı tədbirlər görüldü?

Səhiyyə Nazirliyi yeni yayılan respirator virusla bağlı açıqlama verib.

Nazirlikdən bildirilib ki, metapnevmovirus mövsümi xarakter daşıyan qripə bənzər respirator xəstəlikdir və bütün dünyada geniş yayılıb.

Xəstəlik öskürək, burun tutulması, burun axması, hərarətin yüksəlməsi, nəfəs darlığı, səsin boğulması kimi simptomlarla müşahidə olunur.

Bu infeksiyaya əsasən kiçikyaşlı uşaqlar və immuniteti zəif olan şəxslər yoluxurlar. Virus yuxarı tənəffüs yollarında inkişaf edir və 7-10 gün ərzində yoxa çıxır.

Yanaşı xəstəlikləri olmayan şəxslərdə respirator infeksiyalar əsasən fəsadsız keçir. Lakin immun sistemi zəif olan insanlarda bronxit və ya pnevmoniya formasında ağırlaşmalar yarana bilər.

Nazirlikdən ölkə ərazisində sözügedən virusa qarşı görülən tədbirlər barədə də məlumat verilib.

Bildirilib ki, epidemioloji vəziyyətə nəzarət, epidemik dövrdə qripin hansı ştamlarının dövr etməsini müəyyən etmək üçün Səhiyyə Nazirliyinin Xüsusi Təhlükəli İnfeksiyalara Nəzarət Mərkəzinin müvafiq laboratoriyasında xəstələrin burun-udlaq nahiyəsindən götürülən yaxmaların molekulyar üsulla müayinəsi aparılır.

Yoluxma hallarının qarşısının alınması məqsədilə yüksək həssaslığa malik şəxslərə kütləvi tədbirlərdə və insanların sıx toplaşdığı məkanlarda tibbi maskalardan istifadə, əl gigiyenasına riayət, gündəlik qidalanma rejiminə bol vitaminli ərzaqların daxil edilməsi tövsiyə olunur. Bununla yanaşı, risk qrupuna daxil olan şəxslərin qrip əleyhinə vaksinasiyadan keçməsi arzuolunandır.