Bunları edənlər daha sağlam olur | Xüsusilə 30 yaşdan sonra...

Elmi tədqiqatlar göstərir ki, 30 yaşdan sonra insan sağlamlığında müəyyən geriləmələr başlasa da, kiçik dəyişikliklərlə bu prosesin təsirlərini əhəmiyyətli dərəcədə azaltmaq mümkündür. Əzələ, sümük itkisi, güc azalması və çəki artımı kimi halların tamamilə qarşısını almaq çətin olsa da, bununla bağlı 6 sadə tədbir sağlam həyat tərzini təmin edə bilər.

Birincisi, liflə zəngin qidalar istehlak etmək əhəmiyyətlidir. Lifli qidalar ürək-damar xəstəlikləri, diabet və bağırsaq sağlamlığının qorunmasında mühüm rol oynayır.

İkincisi, gücləndirici və dartıcı hərəkətlərə üstünlük vermək lazımdır. Gəzinti, qaçış və ya velosiped sürmək kimi fəaliyyətlərə əlavə olaraq, həftədə ən azı iki dəfə əzələ gücləndirici məşqlər etmək tövsiyə olunur.

Üçüncüsü, keyfiyyətli yuxu alışqanlığı olmalıdır. Yuxunun sağlamlıq üçün əhəmiyyəti çox böyükdür. Keyfiyyətsiz yuxu yüksək qan təzyiqi, diabet, piylənmə və hətta infarkt riskini artırır.

Hərəkətsiz vaxtı azaltmaq siyahıda dördüncü yerdədir. Araşdırmalara görə, oturaq həyat tərzi erkən ölüm riskini artırır. Hər saat oturaq vəziyyətdə qalmaq ölüm riskini 5 faiz yüksəldə bilər.

Beşincisi, təbiətlə əlaqəni gücləndirmək tövsiyə olunur. Təmiz hava, yaşıl mühit və təbii mənzərələr stresi azaltmaqla yanaşı, maddələr mübadiləsini sürətləndirir və immuniteti gücləndirir.

Son olaraq sosial əlaqələrə diqqət yetirmək mühüm amildir. Bu, insan sağlamlığı üçün siqaret çəkməmək və ya artıq çəki ilə mübarizə qədər vacibdir.

Ekspertlərin fikrincə, qeyd olunan bu altı prinsipə əməl edərək sağlamlığı qorumaq mümkündür.