“Bunu çəkib göstərin” | Gecə “Nağıl Bağ” restoranında nə baş verir? | Sakinlərin şikayəti - Baku TV

Xətai rayonu, Nəsrəddin Tusi küçəsində yerləşən “Nağıl Bağ” restoranı ilə bağlı sakinlərdən Baku TV-nin qaynar xəttinə şikayət daxil olub.

Vətəndaşlar bildirirlər ki, iaşə obyektində gecə saatlarında yüksək səslə musiqi səsləndirilir və bu, ərazidə yaşayan sakinlərin narahatlığına səbəb olur.

Şikayətə əsasən, restoranın yaşayış məntəqəsinə yaxın ərazidə yerləşməsinə baxmayaraq, gecə saatlarında səs səviyyəsinə kifayət qədər nəzarət edilmir. Sakinlər bildirirlər ki, xüsusilə gecə saatlarında musiqinin səsi onların istirahətinə mane olur.

Məsələ ilə bağlı restoran rəhbərliyinin də mövqeyi öyrənilib. Restoran nümayəndəsi bildirib ki, qanunvericiliyə uyğun olaraq musiqinin gecə saat 12-yə qədər səsləndirilməsinə icazə var və obyekt bu qaydalara əməl edir.

Restoran tərəfi iddiaların əsassız olduğunu deyərək, təhlükəsizlik kameralarının görüntülərini təqdim edib. Bildirilib ki, gecə saat 12-dən sonra restoranda canlı musiqi dayandırılır və səhnədə fəaliyyət olmur.

Obyekt nümayəndəsi istənilən tarix üzrə görüntülərin yoxlanıla biləcəyini də qeyd edib.