Cəbrayıl uğrunda canını verən şəhid polkovnik-leytenant Rəşad Quliyev

Afaq Hüseynovanın təqdimatında Vətən müharibəsi şəhidi Rəşad Quliyev haqqında reportaj efirə gedib.

Azərbaycan Ordusunun polkovnik-leytenantı olan Rəşad Quliyev İkinci Qarabağ müharibəsi zamanı Füzuli, Qubadlı və Cəbrayılın azadlığı uğrunda döyüşlərdə savaşıb, oktyabrın 7-də Cəbrayıl döyüşləri zamanı şəhid olub.

Şəhidin anası Mətanət Quliyeva oğlu ilə bağlı xatirələrini bölüşərkən bildirib ki, Rəşad əsgərlərinə həmişə ata, qardaş qayğısı göstərirdi:

“Qurban bayramında əsgərlik müddətini bitirənləri özü yola salardı, ciblərinə xərclik pulu qoyardı. Sevinərdi ki, builki əsgərlərini də sağ-salamat yola saldı”.

M.Quliyeva oğlunun tək-tənha Cəbrayıla kəşfiyyata getdiyini, əsgərlər ac qalmasın deyə onlara erməni mağazasından yemək gətirdiyini deyib:

“Füzuli döyüşləri zamanı yağışa düşüblər. Rəşad əsgərlərinə paltar gətizdirib, özü isə islaq geyimlərini sıxıb geyinib. Əsgərləri 3 gün ac qalıb. Həmin gün göydən mərmi yağırmış, Rəşad güllə kimi erməni mağazasına gedib, onlara yemək gətirib”.