Cəlilabada güclü dolu yağıb

Cəlilabadda dolu yağıb, güclü külək fəsadlar törədib, bəzi ərazilər işıqsız qalıb.

Aprelin 21-də axşam saatlarında yağmağa başlayan dolu 7 dəqiqəyə yaxın davam edib. Güclü külək onlarla ağacı aşırıb.

Rayonun müxtəlif ərazilərində müşahidə olunan dəyişkən hava şəraiti Ələt-Astara magistralının Cəlilabad rayonundan keçən hissəsində yol kənarındakı ağacların aşmasına səbəb olub.

İlkin məlumata görə, 50-yə qədər ağacın aşmasından sonra yol bağlanıb. Təxminən 2 saatdan sonra hər 2 istiqamətdə nəqliyyatın hərəkəti bərpa olunub.

Rayon mərkəzində güclü külək 10 minlik elektrik ötürücüsünün sıradan çıxmasına səbəb olub. Gecə saatlarında rayonun müəyyən hissəsinin elektrik təminatı bərpa edilib.

Rayon Fövqəladə Hallar Komissiyasından verilən məlumata görə, baş vermiş fəlakətin nəticələrinin aradan qaldırılması üçün müvafiq orqanlarla bərabər işlər görülür. İlk növbədə rayonun elektriklə təminatının tam bərpa edilməsi, aşan ağacların təmizlənməsi istiqamətində işlər aparılır.

Təbii fəlakətin fəasadlarını aradan qaldırmaq üçün texnika ilə yanaşı, canlı qüvvə də cəlb edilib.